Mbahet Panairi Regjional i Gjedhit

Agjencia për Zhvillim Rajonal – Lindje (AZhR), në bashkëpunim me Drejtoritë  për Bujqësi të komunave Gjilan, Ferizaj, Kamenicë, Novobërdë, Shtërpcë, Kaçanik, Viti, Hani i Elezit, Partesh, Ranillug dhe Kllokot ka organizuar të martën në fshatin LLabjan panairin regjional të gjedhit

Agjencia për Zhvillim Rajonal – Lindje (AZhR), në bashkëpunim me Drejtoritë  për Bujqësi të komunave Gjilan, Ferizaj, Kamenicë, Novobërdë, Shtërpcë, Kaçanik, Viti, Hani i Elezit, Partesh, Ranillug dhe Kllokot ka organizuar të martën në fshatin LLabjan panairin regjional të gjedhit. Në këtë panair janë ekspozuar mbi 60 gjedhe, ndërsa organizatori ka ndarë 17 shpërblime për disa raca të gjedhit si dhe ka dhënë çmimin për lopën kampion, sipas vlerësimit të komisionit të përbërë nga profesorë të Fakultetit të Bujqësisë dhe Veterinarisë nga Universiteti i Prishtinës.

Blegtoria është një fushë më prioritet për rajonin e lindjes dhe konsiderohet si një prej shtyllave kryesore të zhvillimit ekonomik. Rajoni ka potencial për zhvillim të sektorit të blegtorisë dhe zhvillimi i mëtutjeshëm i këtij sektori do të ndikojë në uljen e papunësisë dhe zhvillim të qëndrueshëm socio-ekonomik.

Agjencioni është i përkushtuar të përkrah dhe koordinoj të gjitha iniciativat dhe aktivitetet të cilat kanë për qëllim krijimin e vendeve të reja të punës dhe zhvillimin socio-ekonomik të rajonit, ka thënë Almir Hyseni nga AZHR, duke nënvizuar se sektori i bujqësisë është potencial i mirë ekonomik, meqë llogaritet se ky regjion ka mbi 60 mijë gjedhe.
Kryetarët e Komunave kanë thënë se vetëm sektori i bujqësisë mund të rrisë fuqinë punëtore dhe të zhvillojë ekonominë e këtij regjioni. Qemajl Mustafa, kryetar i Gjilanit, tha se bujqësia gjithmonë duhet të përkrahet, sepse pos që krijon vende të reja të punës, rritë edhe fuqinë ekonomike dhe lidhet drejtpërdrejtë me ushqimet tona të përditshme. Panairet e tilla promovuese janë tepër të rëndësishme, sepse krijojnë traditë gare dhe nga kjo krijohet edhe cilësia, ka thënë Mustafa.

Bajrush Ymeri kryetar i Artanës, tha se rajoni i lindjes ka potencial për zhvillim të blegtorisë dhe nënvizoi se bujqësia është njëri prej prioriteteve të identifikuara gjatë hartimit të strategjive rajonale. Ai ka falënderuar Bashkimin Evropian për ndihmën dhe kontributin që ka dhënë për të zhvilluar komunat e lindjes.

Zhvillimi i qëndrueshëm ekonomik është prioritet i të gjitha komunave të rajonit të lindjes dhe po ashtu është i rëndësishëm për përmirësimin e cilësisë së jetës së të gjithë qytetarëve, ka thënë Ymeri.

Edhe Shaip Surdulli kryetar i Kamenicës tha se i ka dhënë rëndësi bujqësisë në komunën e tij, duke shtuar se një numër i fermerëve në këtë panair vijnë nga Kamenica.

Arsim Memaj nga Ministria e Bujqësisë tha se investimet në këtë sektor po rriten nga viti në vit, ndërkohë që premtoi mbështetje edhe për blegtorinë si degë e rëndësishëm e bujqësisë.
 

Christof Stock, përfaqësues i BE-së në Kosovë, tha se Bashkimi Evropian është i interesuar të ndihmojë zhvillimin ekonomik të rajonit të lindjes edhe përmes sektorit të bujqësisë. Deri tani sektori i lindjes ka përfituar disa grante, ndërsa 24 biznese kanë përfituar ndihmën tonë, duke llogaritur edhe kurset dhe trajnime falas, tha ai.