Mërgimtarët bëjnë me shtëpi të re familjen Bajrami
Mërgimtarët në Zvicër në qytetin Kreuzlingen janë organizuar dhe kanë ndihmuar në vlerë të mbi 17 mijë eurove duke i ndërtuar shtëpinë familjes së Adil Bajramit nga Llabjani.
Familja e Adil Bajramit nga Llabjani është gëzuar sot pasi falë ndihmës së mërgimtarëve tanë në qytetin Kreuzlingen është bërë me shtëpi të re. Në përurimin e shtëpisë ka marrë pjesë edhe kryetari i komunës së Novobërdës z. Bajrush Ymeri i cili i ka falënderuar mërgimtarët tanë në Zvicër të cilët kanë zgjedhur një familje në Artanë për t`ia ndërtuar shtëpinë e re.
Ymeri tha se kontributi i mërgimtarëve gjithmonë është i mirëseardhur derisa ka falënderuar xhaminë ,,Hëna e re ’’ në Kreuzlingen, Qendra Shqiptare për Kulturë dhe integrim. Grumbullimi i mjeteve financiare për ndërtimin e shtëpisë së familjes Bajrami është mundësuar falë një koncerti ku janë kyçur edhe Ansambli ,,Vatra” , SH.K.A,, Sharri’’ , “SH.K.A ,,Dielli’’, SH.K.I ,,Rinia” , Grupi Teatral ,,Aktrimi’’si dhe , grupin organizativ: Ragip Avdyli, Kadrush Myrtaj, Avni Avdyli, Selatin Bytyqi, Bexhet Berisha, Bejtush Kastrati, Lumni Avdyli dhe Rexhep Myrtaj.
Ymeri ka falënderuar edhe këngëtarin e mirënjohur Mentor Mushkolaj i cili dha kontribut të madh me këngët e tij në koncertin humanitar dedikuar ndërtimit të shtëpisë.
Adil Bajrami ndërkaq nuk ka mundur të fshehë gëzimin. “Për mua është një dhuratë e çmuar sepse kam jetuar në kushte të rënda dhe të papërshtatshme për jetesë” tha Bajrami.
