Kryetari i Komunës mbajti debatin e parë publik
I pari i komunës së Novobërdës, z.Bajrush Ymeri, ka mbajtur të hënën debatin e parë me qytetarët. Në këtë debat, të mbajtur në sallën e Kuvendit, ishin të pranishëm, në një numër solid, qytetarë të lokaliteteve të ndryshme të komunës sonë të cilët ishin aktivë me pyetjet dhe shprehjen e halleve dhe brengave të tyre.
Kryetari i komunës, z.Bajrush Ymeri, i ka njoftuar qytetarët e pranishëm për punën e ekzekutivit dhe legjislativit në gjashtëmujorin e parë të vitit 2012. Fillimisht, kryetari i ka njoftuar të pranishmit për miratimin e disa rregulloreve jetike për komunën (rregullorja për auto taxi, për bursa, rregullorja për marrëveshjen me fshatra lagje dhe vendbanime, për korrje- shirje si dhe rregullorja për gurëthyes) si dhe për 32 vendime të rëndësishme të Kuvendit që drejtpërdrejt ndikojnë në jetën e qytetarëve dhe përmirësimin ekonomik të komunës.
Më tej, kryetari Ymeri, e ka bërë prezantimin e punëvë të të gjitha drejtorive të Komunës së Novobërdës, e me theks të vecantë në disa nga projektet më të rëndësishme siç janë, Salla e Sporteve dhe e Kulturës në Llabjan, ndërtimi i shkollës në Pasjak, ndërtimi i shtegut për ecje nga Qendra e Turizmit deri te Kalaja, projekti për restaurimin e Kalasë, përfundimi i hartimit të Planeve Zhvillimore Komunale, dhe shumë aktivitete tjera të të gjithë sektorëve të komunës.
Me këtë rast, Kryetari Ymeri, falenderoi të gjithë mekanizmat ndërkombëtarë që kanë ndihmuar në realizmin e objektivave zhvillimore të komunës si, Komisioni Evropian, Iniciativa për Komuna Efektive dhe Demokratike DEMI-i, LOGOS-i Zviceran si dhe shume organizata të tjera.
Ndërkohë, qytetarët e pranishëm kanë bërë pyetje të ndryshme ndaj kryetarit, kryesisht lidhur me infrastrukturën nëpër lokalitete të ndryshme, mundësitë e përmirësimit dhe zgjerimit të aktiviteteve të komunës. Kryetari u ka premtuar se, përkundër buxhetit të limituar për inevstime kapitale, do të bëjë përpjekeje maksimale që secila pjesë e territorit të komunës sonë, ta ndjejë dorën e përkrahjes nga qeveria komunale.
