Roli i femrës në pozita vendimmarrëse është shumë i rëndësishëm
Grupi i Grave të Komunës së Gjilanit ka vizituar Komunën e Novobërdës, me ç’rast ka takuar Kryetarin e Komunës Bajrush Ymeri dhe Kryesuesen e Kuvendit Shefkije Mehmeti.
Në këtë takim është diskutuar për rëndësinë e bashkëpunimit reciprok të këtyre dy komunave , si në sferën e zhvillimit ekonomik, zhvillimit të turizmit, bashkëpunimin me komunitetet, arsimimin e të rinjve, përfaqësimin gjinor nëpër institucione, ofrimin e shërbimit sa më të mirë për qytetarët, të cilët para procesit te decentralizimit kanë qenë pjesë e komunës së Gjilanit, e që tani janë qytetarë të komunës së Novobërdës.
Kryetari i komunës së Novobërdës Bajrush Ymeri ka thënë se i ka marr të gjitha veprimet e duhura për të qenë sa më afër qytetarëve dhe për t’ua lehtësuar atyre marrjen e shërbimeve administrative, ndërkohë që e ka mirëpritur interesimin e Grupit te Grave të Komunës së Gjilanit për ta vizituar Novobërdën, duke shprehur vullnetin e mire të institucioneve të atjeshme, që kjo formë e takimeve të vazhdoj në të ardhmen.
" Roli i femrës në pozita vendimmarrëse është shumë i rëndësishëm, dhe se Komuna e Novobërdës ka një qasje të mirë, duke qene e vetmja ne rajon qe ka emëruar Kryesuesen e Kuvendit, femër, e cila do ta përkrah angazhimin e Grupit Joformal të Grave në Novobërdë, në realizimin objektivave, dhe gjithashtu ka vlerësuar lart themelimin e bordit të Grave të rajonit të Gjilanit dhe objektivave qe paraqet ky grup",theksoi Kryetari z.Ymeri.
Ndërsa, Shefkije Mehmeti ka folur për përvojën e saj si Kryesuese e Kuvendit te Komunës, rreth bashkëpunimit me anëtaret femra ne komunë, duke shprehur gatishmëri që të bashkëpunoj me këshilltaret e kuvendeve nga komunat e rajonit për përfaqësim sa më të mirë dhe të avancuar të tyre nëpër të gjitha fushat e jetës.
Ndërsa, Shpresa Kurteshi, kryesuese e Grupit të Grave të Komunës së Gjilanit ka thënë se vlerësojnë rëndësinë e këtij takimi duke u njoftuar më afër me qasjen e Komunës së Novobërdës ndaj qytetarëve dhe pronave të tyre të cilët para decentralizimit, dikur ishin qytetarë të Gjilanit, e qe tashmë janë qytetarë të Novobërdës, duke vlerësuar përpjekjet dhe angazhimin që institucionet komunale po e bëjnë në këtë drejtim.
“Ne si këshilltare të Kuvendit Komunal të Gjilanit, e shohim si të nevojshëm bashkëpunimin rajonal me të gjitha komunat fqinje, për interesa të përbashkëta, për zhvillim e përparim në të gjitha sferat, duke qenë edhe anëtare e Bordit të Grave te rajonit të Gjilanit. Konsiderojmë se ky lloj i bashkëpunimit do të sjellë produktivitet ne punë dhe do të na fuqizoj në pozitat tona të cilat i ushtrojmë, duke u angazhuar për një jetë më të lehtë dhe shërbim sa më të mirë për qytetarët”, ka thënë Kurteshi.
