Pavarësia e Amerikës festohet edhe në Novobërdë
Dita e Pavarësisë së Shteteve të Bashkuara të Amerikës, 4 Korriku, përveç në kryeqendrën e Kosovës në Prishtinë, këtë vit do të festohet edhe në komunën e Novobërdës. Ky është një vendim i përbashkët ndërmjet kryetarit të komunës, z.Bajrush Ymeri dhe kryetarit të shoqatës “Miqtë e Amerikës”, z. Agim Rexhepi.
Ky vendim është rezultat i një takimi të përzemërt që kryetari i komunës, z.Ymeri e ka pasur të martën me kryetarin e shoqatës “Miqtë e Amerikës” në ambientet e komunës së Novobërdës.
Shënimi i festës së Pavarësisë së Amerikës, në komunën e Novobërdës do të përcillet edhe me disa aktivitete kulturore, siç është mbajtja e një koncerti nga Shoqëria Kulturor Artistike “Artana” si dhe emërimi i një rruge të komunës sonë me emrin e ish-presidentit të SHBA-së, George W.Bush. Po ashtu edhe nxënësit e shkollave të mesme do të marrin pjesë në një garë esesh me temën “Pse e dua Amerikën”.
Për kryetarin e komunës z.Ymeri ky është një nder i veçantë që Shoqata “Miqtë e Amerikës" ia bënë komunës sonë. “Ndjehemi të privilegjuar që komuna jonë është përzgjedhur si vend ku do të kremtohet festa e madhe e shtetit tonë mik, Amerikës, 4 korriku. Ne do të jemi thellësisht të përkushtuar që ky aktivitet të mbahet në mënyrën më të mirë të mundshme në komunën tonë”, ka deklaruar kryetari i komunës, z.Bajrush Ymeri.
