Regjistrim i mbarë i popullsisë në Komunën e Novobërdës
Komuna e Novobërdës, përkatësisht Komisioni Komunal për Regjistrimin e Popullsisë, i ka bërë me kohë përgatitjet e duhura që procesi i regjistrimit të popullsisë të shkojë për mbarë.
Që nga data 1 prill, 46 regjistrues të komunës së Novobërdës kanë dalë në terren, nëpër qarqet e tyre regjistruese të të gjitha komuniteteve. Raportimet e para nga terreni janë mjaft inkurajuese. Të gjithë qytetarët e komunës së Novobërdës po i përgjigjen pozitivisht thirrjes për regjistrim, pavarësisht se cilit komunitet i takojnë. Deri më tash ka pasur indikacione të pakta për refuzues të mundshëm të procesit, por ato janë raste individuale që pritet të zgjidhen me kohë, por procesi në tërësi po ecën mbarë.
Mbarësisë së këtij procesi i ka paraprirë organizimi i duhur dhe me kohë i KKR-së si dhe subjekteve tjera të angazhuara në këtë proces, mbikëqyrësve, kontrollorëve dhe regjistruesve të komunës sonë. Puna në terren ka nisur më 1 prill dhe do të përmbyllet më 15 të po këtij muaji kur pritet të mblidhen të gjitha të dhënat e kërkuara sipas procesit të regjistrimit të popullsisë, të organizuar nga Enti i Statistikave të Kosovës.
Komisioni Komunal është në kontakt të përhershëm me Entin e Statistikave të Kosovës ku raportin çdo ditë për ecurinë dhe mbledhjen e të dhënave nga terreni. Dhe kështu do të vazhdojë deri në fund të këtij procesi shumë të rëndësishëm për popullin dhe vendin tonë, rrjedhimisht edhe për komunën e Novobërdës.
