Dy fshatra të Komunës së Novobërdës që nga dita e sotme nuk do të kenë më probleme me ujin. Komisioni Evropian hapi rrjetin e furnizimit me ujë i cili siguron ujë të pijshëm dhe furnizim të rregullt për 1000 banorë në komunën e Novobërdës. Ky furnizim me ujë do të përmirësojë në masë të konsiderueshme kushtet e jetesës fillimisht për dy fshatra e më pas edhe për zonën më të gjerë të Novobërdës.
Me përfundimin e këtij projekti banorët e fshatrave të Qylkocit dhe Tullarit për herë të parë kanë një rrjet të sigurt të furnizimit me ujë si dhe pajisjet e nevojshme për funksionimin e duhur të rrjetit. Për më tepër, burimi i ujit dhe rezervuari i ndërtuar ofrojnë mundësinë për ta zgjeruar rrjetin e furnizimit me ujë duke mbuluar zonat e banuara në afërsi, sikurse që është fshati Bostan dhe tërë qyteti i Novobërdës.
Ofrimi i infrastrukturës funksionale dhe e qëndrueshme për furnizim me ujë është pjesë e një programi më të gjerë e zhvillimit të infrastrukturës sociale dhe ekonomike me ndihmën e fondeve të BE-së.
Rrjeti i furnizimit me ujë në Novobërdë ka kushtuar afërsisht 400,000 EUR. Kryetari I Novobërdës Bajrush Ymeri ka shprehur falënderimet e qytetarëve të komunës së tij për Komisionin Evropian dhe taksapaguesit evropian. “Investimi i afro 400 mijë eurove në ujësjellësin e ndërtuar nga paratë e taksapaguesve evropian, për komunën tonë, është një investim jashtëzakonisht i çmueshëm dhe i rëndësishëm për ne. Vlera e investimit rritet edhe më tepër kur kujtojmë se këto para kanë shkuar në rregullimin e nevojave më elementare jetësore për banorët e Tullarit dhe Qylkocit , në sjelljen e ujit nëpër shtëpitë e e tyre. Uji që do të pikojë në secilën familje të këtyre fshatrave është shenjë e fuqishme e jetës dhe mundësive për jetë. Vlera e këtij investimi rritet edhe më shumë për faktin se edhe institucionet tona të rëndësishme, si ambulanca dhe shkolla e këtyre fshatrave tashmë janë bërë me ujë të pijshëm.“ ka thënë Kryetari Bajrush Ymeri.
