Komuna e Novobërdës ka marrë mbështetje për zhvillimin e mëtejmë nga Presidenti i Republikës së Kosovës Fatmir Sejdiu i cili sot u prit nga Kryetari i Komunës Bajrush Ymeri.
Presidenti Sejdiu u njoftua nga krerët komunalë të Novobërdës me të arriturat e qeverisë lokale, me projektet që janë realizuar dhe janë në realizim gjatë këtij viti si dhe me të arriturat e tjera të komunës pas zgjerimit të saj sipas planit të decentralizimit në Kosovë. Pjesë e diskutimeve gjatë këtij takimi ishte edhe restaurimi i kalasë së Novobërdës, për të cilën Presidenti dha mbështetjen e tij.
“Çmoj shumë lart punët që janë bërë nga kryetari i komunës me njerëzit, me qytetarët e kësaj ane. Vizionin që kanë këta, që vërtet komuna të jetë një realizim i pritjeve të të gjithë njerëzve që u kanë dhënë mbështetje”, theksoi Presidenti Sejdiu.
Duke folur për marrëdhëniet ndëretnike në mes të shqiptarëve dhe serbëve lokal në Novobërdë Presidenti Sejdiu tha “Çmoj shumë lart bashkëpunimin mes dy etnive kryesore, në kuptimin e numrave, shqiptarëve dhe serbëve, por edhe të komuniteteve të tjera dhe them po ashtu shembullin e mirë që është historik, në periudha të gjata kohore të bashkëpunimit në projekte të rëndësishme”, vijoi Presidenti Sejdiu.
Presidenti e ka vlerësuar si temë të veçantë decentralizimin në Komunën e Novobërdës. “Për ne është me rëndësi se të gjitha proceset që i kemi kapërcyer edhe në kuptimin politik dhe procesi i decentralizimit në këtë hapësirë ka qenë një temë e veçantë me zgjerimin kadastral, por, them se njerëzit që janë bashkuar do të jenë bashkëpunëtorë të mirë në vazhdimësi si qytetarë, si njerëz që duan t’i realizojnë interesat e tyre brenda komunës dhe një kohezion të mirë bashkëpunimi që është edhe me prezencën ndërkombëtare në Kosovë, me njerëz të ICO-së, EULEX-it, por të njëjtën kohë edhe më një bashkëpunim shumë të thellë që kanë me KFOR-in, gjithmonë në të mirë të komunës”, theksoi Presidenti Sejdiu.
Ndërsa Kryetari i Novobërdës Bajrush Ymeri e vlerësoj lartë vizitën e bërë nga Presidenti i Kosovës duke thënë se kjo vizitë i jep mbështetje punës së mirë që po bëjnë strukturat komunale në përmirësimin e jetës së banorëve të Novobërdës.” Pres që pas këtij takimi gjerat të lëvizin në anën e duhur për restaurimin e kalasë së Novobërdës e cila lidhet direkt me zhvillimin e turizmit rural, andaj e vlerësoj premtimin e Presidentit për t`u angazhuar në këtë çështje” tha kryetari Ymeri.
Presidenti Sejdiu gjatë vizitës në Novobërdë shoqërohej edhe nga Ministri i Pushtetit Lokal Sadri Ferati.
