Kalaja e Novobërdës, afër shansit të madh
Kalaja e Novobërdës dhe tërësia e saj si dhe potenciali tjetër i natyrës dhe ai njerëzor ka premise të mëdha të shndërrohet në një burim të zhvillimit ekonomik, turistik dhe kulturor të komunës sonë. E kjo ka dalë pas takimit që kryetari i komunës, z.Bajrush Ymeri, ka pasur të hënën me dy ministra të Qeverisë së Kosovës, Memli Krasniqi, ministër i MKRS-së dhe Blerand Stavileci, ministër i MBPZHR-së. Në këtë takim ka qenë i pranishëm edhe z. Christof Stock, shef i Zyrës Ndëlidhëse të Komisionit Evrpopian dhe Alan Parker, menaxher i projektit, binjakëzimi i komunave.
Temë e takimit ishte projekti për tërësinë e Kalasë së Novobërdës, projekt i cili do të përkrahet nga ministritë e lartëpërmendura dhe Komisoni Evropian. Qëllimi i projektit është që tërësia e Kalasë së Novobërdës të shndërrohet një një vend atraktiv për turzimin dhe biznesin lokal të vendit. E tërë kjo punë do të bëhet duke ecur në bazë të ligjeve dhe kritereve për ruajtjen, shpërfaqjen dhe valorizimin e trashëgimisë arkeologjike e kulturore.
Projekti në fjalë, sipas të parit të komunës, z.Bajrush Ymeri, ka rëndësi jetike për zhvillimin dhe afirmimin e trashëgimisë sonë të pasur, krijimin e mundësive më të mëdha turistike e rrejdhimisht edhe mundësinë më të mirë për mirëqenien e qytetarëve tanë që prodhimet e tyre specifike t’i prezantojnë para vizitorëve.
Në këtë takim edhe ministrat, Krasniqi dhe Stavileci, kanë premtuar përkrahjen e ministrive të tyre, profesionale dhe financiare me qëllim që ky projekt të bëhet një model i zhvillimit kulturor, por edhe ekonomik i vendit.
Edhe përfaqësuesi i Komisionit Evropian, z.Christof Stock, ka shprehur vullnetin që ta përkrah këtë projekt, dhe ka dhënë sugjerimet dhe këshillat e tij me qëllim që e tërë puna të kompletohet.
Projetki në fjalë vlerësohet se mund të kushtojë rreth 1.5 milionë euro dhe në të të participojë Komisioni Evropian, Qeveria e Kosovës dhe donatorët tjetër të mundshëm.
Pas diskutimeve mjaft konstruktive të kryetarit të komunës, Z.Ymeri me ministrat Krasniqi e Stivalicei si dhe z.Stock nga KE-ja, ka dalë konkluzioni që projekti për Kalanë është mjaft me interes dhe se takimet lidhur me hapat konkretë do të vazhdojnë shumë shpejtë me qëllim të jetësimit të tij.
