Komuna e Novobërdës, mbështetur nga Programi për Përmirësimin e Mjedisit Afarist (BEEP) i USAID, ka mbajtur një takim me bizneset e komunës së Novobërdës
Në këtë takim është diskutuar për mundësitë e avancimit të mjedisit biznesor në komunë.
Kryetari i komunës së Novobërdës, z. Bajrush Ymeri, me këtë rast theksoi se komuna është e interesuar të ndërtojë një partneritet të mirëfilltë me komunitetin biznesor dhe takime të këtilla me bizneset do të vazhdojnë edhe më tutje duke u përforcuar në të ardhmen.
Kryetari Ymeri, së bashku me drejtuesit tjerë komunalë, u propozoi bizneseve që të themelojnë një shoqatë biznesore, e cila do të përfaqësonte bizneset dhe do të ishte zëri i tyre i përbashkët në adresimin e kërkesave të tyre para institucioneve komunale.
Gjithashtu, Kryetari Ymeri informoi të pranishmit se ai shumë shpejtë do të iniciojë në Kuvendin Komunal të Novobërdës lirimin e të gjitha bizneseve të reja nga pagesa e taksave komunale. Kjo për të lehtësuar mjedisin afarist në komunë.
Ndërsa, Koordinatori për komunën e Prishtinës nga projekti BEEP i USAID, Salvador Elmazi, ka prezantuar një raport hulumtues me biznese dhe ka rekomanduar disa masa për përmirësimin e mjedisit afarist në komunë të Novobërdës."
